(កំពង់ធំ)÷ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងជាប្រធានគណៈកម្មាធិការកណ្តាលសមាគមនារីកម្ពុជា ដើម្បីសន្តិភាព និងអភិវឌ្ឍន៍ ឯកឧត្តម លោកជំទាវអភិបាលអភិបាលរងខេត្ត ដែលបានអញ្ជើញជាអធិបតីក្នុងពិធីប្រកាសកែសម្រួលសមាសភាពគណៈកម្មការសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ ខេត្តកំពង់ធំ នារសៀលថ្ងៃទី០៩ ខែមេសា ឆ្នាំ២០២២ នៅភោជនីយដ្ឋាន ឡូវ គឹមសេង ។
ក្នុងឱកាសនោះ ឯកឧត្តម ងួន រតនៈ អភិបាលខេត្តកំពង់ធំ បានឡើងរាយការណ៍ ដោយមានការយកចិត្តទុកដាក់ទៅលើកិច្ចការងារមួយចំនួនដែលពាក់ព័ន្ធ ជាមួយស្ត្រីរួមមាន ៖
១.បន្តពង្រឹងភាពអង់អាចរបស់ស្ត្រីដោយបង្កើនសក្តានុពលចំពោះស្ត្រីក្នុងតួនាទីជាដៃគូដ៏មានតម្លៃ ជាមួយនឹងបុរសក្នុងសង្គម។
២.បន្តលើកកម្ពស់សុខមាលភាពស្ត្រីដោយអនុវត្តគោលនយោបាយគាំពារសង្គមរបស់រាជរដ្ឋាភិបាលចំពោះស្រ្តីមានផ្ទៃពោះ ក្មេងស្រី និងស្ត្រីងាយរងគ្រោះ ។
៣.បន្តផ្សព្វផ្សាយអប់រំសីលធម៌សង្គម នៅគ្រប់វេទិកា គ្រប់រូបភាព តាមប្រព័ន្ធបណ្តាញសង្គមសំដៅ បង្ការទប់ស្កាត់ការប្រើហិង្សាលើស្រ្តីនិងកុមារ ។
៤.ផ្ដល់កាលានុវឌ្ឍភាពចំពោះស្រ្តីក្នុងការទទួលពុទ្ធិ ចំណេះដឹង ជំនាញ ទាំងបរិមាណ និងគុណភាព ដើម្បីឆ្លើយតបទៅនឹងបរិបទសង្គម ។
៥.បន្តចូលរួមលុបបំបាត់រាល់ទម្រង់នៃការរើសអើងប្រឆាំងនឹងស្ត្រីដោយបានចាត់ទុកស្ត្រីជាឆ្អឹងខ្នងនៃសេដ្ឋកិច្ចរបស់សង្គមជាតិ។
នៅក្នុងពិធីសំណេះសំណាលដ៏មានអត្ថន័យនិងមានខ្លឹមសារនោះដែរ លោកជំទាវកិត្តិសង្គហបណ្ឌិត ម៉ែន សំអន បានកោតសរសើរដោយស្មោះ និងវាយតម្លៃខ្ពស់ចំពោះ សាខាសមាគមនារីកម្ពុជា ដើម្បីសន្តិភាព និងអភិវឌ្ឍខេត្ត ដែលបានចូលរួមយ៉ាងសកម្មក្នុងការអភិវឌ្ឍនខេត្ត ។ លោកជំទាវបន្ដថា ការងារមនុស្សធម៌ និងសកម្មភាពផ្សេងទៀតជាពិសេស បានដើរតួនាទីយ៉ាងសំខាន់នៅក្នុងការជំរុញ ស្ត្រី កុមារ និងជនងាយរងគ្រោះឲ្យទទួលបាននូវសិទ្ធិការពារនិងផលប្រយោជន៍តាមរយៈការកែប្រែឥរិយាបថ សង្គមដោយទទួលស្គាល់ស្ត្រីជាដៃគូដ៏សំខាន់នៅក្នុងការអភិវឌ្ឍសង្គមជាតិ។
លោកជំទាវក៏បានអំពាវនាវឲ្យបន្តការធានាដ៏ប្រពៃនេះបន្ថែមទៀត ដើម្បីវឌ្ឍនភាពនិងសុខដុមនីយកម្មនៅក្នុងខេត្តកំពង់ធំទាំងមូល ជាមួយ នោះដែរខិតខំផ្សព្វផ្សាយកម្មវិធីគោលនយោបាយ សេចក្ដីណែនាំរបស់គណបក្សដល់បងប្អូននារីនៅមូលដ្ឋាន និងចលនាមហាជននារីក្នុងការជួយគៀងគររកសំឡេងឆ្នោតសម្រាប់ការបោះឆ្នោតជូនគណបក្សប្រជាជន កម្ពុជាឲ្យបានផុលផុស និងឆន្ទៈគាំទ្រពេញទំហឹងចំពោះគណៈបក្សប្រជាជនកម្ពុជាឲ្យទទួលបានជោគជ័យ នាពេលបោះឆ្នោតខាងមុខនេះ ៕ដោយ៖ មន្ទីរព័ត៌មានខេត្តកំពង់ធំ សម្រួលផ្សាយដោយ៖ dara